అనంతపురం జిల్లా రాప్తాడులో వైకాపా నాయకులు రెచ్చిపోయారు. అనంతపురం నగరానికి ఆనుకుని ఉన్న రాప్తాడు నియోజకవర్గం ప్రసన్నాయపల్లిలోని దళితుల కాలనీలో బుధవారం రాత్రి ఎమ్మెల్యే తోపుదుర్తి ప్రకాశ్‌రెడ్డి అనుచరులు విధ్వంసం సృష్టించారు. కాలనీలోని పూరి గుడిసెలను తగలబెట్టారు. అడ్డొచ్చిన దళితులపై విచక్షణరహితంగా దాడి చేశారు. బాధితులు తెలిపిన వివరాల మేరకు.. ప్రసన్నాయపల్లి రెవెన్యూ పరిధి 123/2బీ సర్వే నంబరులోని రెండెకరాల్లో స్థానిక దళితులు కొన్ని రోజుల కిందట గుడిసెలు వేసుకున్నారు. ఆ భూమిపై అంతకుముందే వైకాపా నాయకులు కన్నేసినట్లు చెబుతున్నారు. అక్కడ గుడిసెలు ఖాళీ చేసి వెళ్లిపోవాలని రెండు రోజులుగా వైకాపా నాయకులు తమపై ఒత్తిడి తెస్తున్నారని, తాము నిరాకరించడంతో పలుమార్లు దౌర్జన్యానికి దిగారని బాధితులు చెబుతున్నారు. ఈ క్రమంలో బుధవారం జైభీమ్‌ భారత్‌ పార్టీ పులివెందుల అభ్యర్థి దస్తగిరి (వైఎస్‌ వివేకానందరెడ్డి హత్య కేసులో అప్రూవర్‌) ప్రసన్నాయపల్లి వచ్చి దళితులను పరామర్శించారు.
జగన్‌ ప్రభుత్వం దళితులపై ఉక్కుపాదం మోపుతోందని ఆరోపించారు. వైకాపా నాయకులు కొండలు, గుట్టలు మింగేస్తున్నా పట్టించుకోని ముఖ్యమంత్రి.. నిరుపేద దళితులు ప్రభుత్వ భూమిలో గుడిసెలు వేసుకుంటే సహించలేకపోతున్నారని విమర్శించారు. దీంతో స్థానిక ఎమ్మెల్యే ప్రకాశ్‌రెడ్డి అనుచరులు ఆగ్రహించారు. మాకు వ్యతిరేకంగా దస్తగిరిని తీసుకొస్తారా.. అంటూ రాత్రి 9.30 గంటల ప్రాంతంలో దళిత కాలనీపై దండెత్తారు. కర్రలు, ఇనుపరాడ్లతో దళితులను విచక్షణరహితంగా కొట్టి, గుడిసెలను తగలబెట్టారు. రెండు ద్విచక్రవాహనాలను దహనం చేశారు. ఈ దాడిలో పలువురికి గాయాలయ్యాయి. జైభీమ్‌ భారత్‌ పార్టీ రాప్తాడు నియోజకవర్గ ఇన్‌ఛార్జి నరేశ్‌, కార్యకర్త విజయ్‌ తీవ్రంగా గాయపడ్డారు. మరో ఇద్దరి ఆచూకీ తెలియడం లేదని బాధితులు చెబుతున్నారు. క్షతగాత్రులను అనంతపురం సర్వజనాసుపత్రికి తరలించి చికిత్స అందిస్తున్నారు.
వైకాపా నాయకుల దాడుల నుంచి తప్పించుకున్న దళితులు రాప్తాడు పోలీస్‌స్టేషన్‌కు పరుగులు తీశారు. సీఐ మునిస్వామి శ్రీకాళహస్తిలో బందోబస్తులో ఉండటంతో ఆ సమయంలో అక్కడ ఇటుకలపల్లి సీఐ నరేందర్‌ విధులు నిర్వహిస్తున్నారు. వైకాపా నాయకులు తమపై దాడికి పాల్పడుతున్నారని ఫిర్యాదు చేస్తే సీఐ కనీసం పట్టించుకోలేదని.. తిరిగి తమనే అసభ్యపదజాలంతో దూషించారని బాధితులు వాపోయారు. గుడిసెలు వేసుకున్న స్థలం మీ అయ్య జాగీరా? ముందు అక్కడి నుంచి ఖాళీ చేయండని తమను బెదిరించారని చెప్పారు.
source : eenadu.net
Discussion about this post